منتدى عائلة أبو شعبان
أهلاً وسهلاً بالزوار الكرام لمنتدى عائلة أبو شعبان
يمكنكم مشاركتنا فقط بعد التسجيل

الكنافة النابلسية (على طريقة ام لؤي)

استعرض الموضوع السابق استعرض الموضوع التالي اذهب الى الأسفل

الكنافة النابلسية (على طريقة ام لؤي)

مُساهمة من طرف ام لؤي في الجمعة مايو 14, 2010 3:50 pm


الكنافة النابلسية (على طريقة ام لؤي )

من طرف ام لؤي, في 20/07/2009 على الساعة 22:37

هذا ياجماعة الخير اليوم عملت صدر كنافة مرتب وفي الآخر اتزكرت اصور هالقطعة الي ضلت فاعذروني بس هي عينة من هالكنافة الطيبة وهي الطريقة لمن احب ان يعملها .
اولا بنجيب الكنافة الناعمة وإذا لم تتوفر نحضر العادية ويتم تنعيمها في البيت ثم نضع في الصينية التي سنقوم بخبز الكنافة فيها كمية من الزبدة وتكون نوعية جيدة ونضعها على عين الغاز وفوقها الكنافة وقليل من صبغة الكنافة وإذا لم تتوفر يمكن الاستغناء عنها .
نحرك الزبده بالكنافة والصبغة على نار متوسطة الى هادية حتى تاخد بعضها وتسخن في إيدنا .
نوزع الكنافة بالصينية ونكبسها بالضغط عليها بقوة وتكون كمية الكنافة متساوية بكل جزء من الصينية .
نوزع على هذه الطبقة كمية من جبنة المزاريلا المبشورة وتكون طبقة خفيفة وفائدتها انها تلصق الكنافة بخلطة الجبنة وكمان بتعطي طعم طيب .
نيجي للجد نحضر كمية من الحليب على النار ونضيف لها ملعقة اواقل من السكر وكمية من الفانيلا وكمية من السميد وعندما يبتديء المقدار بالغليان نضيف الجبنة النابلسية المحلية والمقطعه اوممكن استخدام الجبنة العكاوي المحلية .
يعني خلطة الحليب بالسميد عبارة عن وسط نستخدمة لاذابة الجبنة وكل ماكانت كمية الجبنة النابلسي اكتر كل ماكانت الكنافة اطيب واقرب للطعم الطيب في الاخير ممكن اضافة علبة من القشطة وممكن نستغني عنها لوكانت الجبنة كميتها حلوة مارح نحتاج علبة القشطة .
نوزع خلطة الجبنة على الكنافة وماتكون كتير سميكة بل اطيب تكون وسط ونساوي السطح وتدخل الى فرن متوسط الحرارة محمى مسبقا لمدة ثلث ساعة او اكثر قليلا او اقل حسب حماوة الفرن .
نخرجها من الفرن وبسكين نبعد الحشوة عن الاطراف ثم تقلب في صينية اكبر ويوزع القطر على وجهها حسب الرغبة وتقطع وتقدم وصدقوني زاكية كتير وبتبيض الوجه ويارب عوافي على قلوبكم ياجماعه (قولو لي هو انتو خليتولنا حاجة )
نتائج البحث عن "الكنافة النابلسية (على طريقة ام لؤي )"
19 ردود
الرد
1 أبو حلمي, في 21/07/2009 على الساعة 06:50
يسلموا ايديكي إم لؤي....حاجة بتفتح النفس
2 ام سامر, في 21/07/2009 على الساعة 07:17
يسلمو يا ست الكل ام لؤي ..
وصفه باين عليها طيبه وسهله كتير...بتضل اطيب وانظف من شغل المحلات...
تقبلي تحيتي ومودتي..
3 ام لؤي, في 21/07/2009 على الساعة 11:48
اهلا بمرورك الكريم ياعمنا الحاج ويعطيك العافية
تحياتي وإحترامي لك .
4 ام لؤي, في 21/07/2009 على الساعة 11:50
اهلا بيكي يا ام سامر ياسكرة وبالفعل شغل البيت بناكله وإحنا مطمنين .
وشكرا لمرورك الكريم ياست الكل .
محبتي لك .
5 Eng.Ghadeer, في 24/07/2009 على الساعة 09:10
يسلمووو اديكي يا ام لؤي عالوصفة للكنافة الزاكية وكدا اكلتو كل الصينية وما خلتولنا الا شقفة وحدة؟؟!!!!!

ههههههه...الف صحة وعافية وهادا اكيد من زكاوتها.....

يسعد صباحك ام لؤي ويعطيكي العافية
6 ام لؤي, في 24/07/2009 على الساعة 11:39
صحتين على قلبك يانوارة ويسعد صباحك الحلو ياقمر .
ولا يهمك المرة الجاية بصور صدر كنافة بحاله بس برضو معروف مصيره لوين .
جربي هذه الطريقة واكيد رح تعجبك وبالمناسبة انا تعلمتها من سنين طويلة من بنت احد اصدقاء والدي رحمه الله وكانت صغيرة جدا في هداك الوقت بس شطورة كتير ماشاء الله عليها وبيطلع من تحت ايديها اطيب اكل الله يذكرها بالخير .
محبتي ومودتي لك يانوارة .
7 منى, في 14/09/2009 على الساعة 22:55
يسلموا ايديكي يا ام لوي اكلات بتجنن بس بدي اسالك على السميد يعني قديش نحط هو والحليب
8 ام لؤي, في 15/09/2009 على الساعة 21:07
اهلا بتواجدك اخت منى .
بالنسبة لكمية الحليب والسميد انا مابعمل بمقدار معين ولكن لازم تكون مقدار سماكة الحليب والسميد متوسطة ثم نضيف لها الجبنة النابلسية المحليه اي تكون كوسط نذيب فيه الجبنة وكل ماكانت كمية الجبنة اكثر بتكون كمية الحليب والسميد اقل وطبعا بيكون الطعم اطيب .مثلا لصينية متوسطة الحجم ممكن نضع كوبين حليب واربع الى خمس ملاعق سميد وبيمشي الحال وكمية من الجبنة ممكن تكون اكثر من نصف كيلو وطبعا جبنة محلية ومفتتة باليد .
يارب اكون قدرت ارد على تساؤلك ياعسل .
ولك ودي ومحبتي .
9 علاء مازن محمد ابو شعبان, في 25/10/2009 على الساعة 17:59
انشاء الله بنجربها لانها عمايل بنت عمي
10 ام لؤي, في 27/10/2009 على الساعة 11:59
مشكور اخ مازن وإن شاء الله بتجربوها وبتعجبكم .
تقبل تحيتي .
11 Haider Mohammed, في 29/10/2009 على الساعة 11:02
شكراً أخت أم لؤي على الوصفه الطيبه.
يبدوا أنها لذيذه من طريقة عمايلها ، ولكن المشكلة في الجبنه النابلسيه المحليه ، فهي تباع في رمضان فقط عند محلات الحلويات الشرقيه ، وفي غير رمضان يجب أن تطلب بالتواصي وتكون غاليه جداً.
ولكن ربما نجد البديل في الجبنه العكاويه ( صناعه تشيكيه ) .
تقبلي مروري وتعليقي .
12 ام لؤي, في 29/10/2009 على الساعة 16:39
معاك حق يا مختارنا حتى احيانا نشتري الجبنة النابلسية وبتطلع مش نوعية كويسه لكن بالجبنة العكاوي بيمشي الحال ونحن هنا عندنا جبنة عكاوي صناعة سعودية (لشركة استرا السعودية )طعمها كتير طيب ومتوفرة بالسوق دائما .
إن شاء الله بتجربوها وبتعجبكم .
ومشكور يامختارنا لمرورك الكريم بارك الله فيك .
تقبل تحيتي .
13 رشا, في 04/01/2010 على الساعة 09:32


* مممممممممممممم شو باين عليها لذيذه الله يسلم ايدك بس عندي طلب من حضرتك
انا ساكنه برفح وما في عندنا جبنه نابلسيه شو اعمل نفسي اجربها بس قد ما سالت ما في جبنه نابلسيه ولا جبنه عكاوي برفح وعلشان هيك بعملها بالسميد والحليب مخلوطين بعلبة قشطه وماء زهر بتعطي نتيجه ممتازه بس مو نفس طعم الكنافه النا بلسيه الاصليه وين ممكن الاقي الجبنه النابلسيه وبدي اسم المحل علشان ابعت اجيبها وشكرا كتير لالك

14 ام لؤي, في 04/01/2010 على الساعة 11:56
اهلا بتواجدك معنا اخت رشا في ديوان العائلة
أنا آسفة كتير لاني لاأستطيع إفادتك عن مكان بيع الجبنة النابلسية او العكاوية في رفح او في غزة عموما لاني اقطن خارج فلسطين .
لكن مارح نغلب يمكنك استعمال القليل من جبنة الموزاريلا المبشورة مع خلطة السميد والحليب وبيمشي الحال (بس طبعا مش بنفس الطعم كما لو كنا نستخدم الجبنة العكاوي او النابلسي )وزي ماقالو جداتنا الغزالة الشاطرة بتغزل ب.................وانتي كملي .
ومشكوووووووووورة اخت رشا ويارب اكون افدتك .
تقبلي تحيتي .
15 abu waled, في 04/01/2010 على الساعة 19:09
اهلا وسهلا اخت رشا


بالنسبه للجبنه العكاوي او النابلسيه موجوده في غزه البلد


سوق الزاويه


لدي محلات محسن ابو حميد


نورت الديوان اخت رشا
16 دعاء, في 19/02/2010 على الساعة 22:14
ماشاء الله عليكى يابنت العمه ويسلمو ايديكى على الوصفات الطيبه
17 ام لؤي, في 19/02/2010 على الساعة 23:17
الله يسلمك ويعافيكي يا إبنة الخال
امتناني لمرورك الكريم
تقبلي تحيتي ومودتي .
18 ام عماد الدين, في 21/02/2010 على الساعة 21:01
يسلمو يسلمووووووووووو يا ام لؤي
لازم أتابع أكلاتك لحتى أتعلم منك
محسوبتك ماجستير صحة نفسية ,,لكن ابتدائية طبخ ههههههه
19 ام لؤي, في 22/02/2010 على الساعة 04:41
الله يسلمك يا شيماء ياقمر
أتشرف بمتابعتك لي يا غالية .
وممكن تسيري دكتوراه طبخ من خلال التعلم من والدتك فهي ماهرة في الطبخ كما أعرف .
مشكوووووووورة لمرورك الكريم بارك الله فيكي .
تقبلي تحيتي ومحبتي .
avatar
ام لؤي
عضو مجتهد
عضو مجتهد

انثى
عدد المساهمات : 536
تاريخ التسجيل : 11/05/2010
الموقع : في مكان ما على كوكب الارض

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى